کولکاتہ، 8/اگست (ایس او نیوز /ایجنسی) کمیونسٹ پارٹی آف انڈیا (مارکسسٹ) اور مغربی بنگال کے سابق وزیراعلیٰ بدھادیو بھٹاچاریہ انتقال کر گئے ہیں۔ انتقال کے وقت ان کی عمر 80  سال تھی۔  رپورٹ کے مطابق معروف سیاستداں کئی برسوں سے پھیپھڑوں کے مرض میں مبتلاتھے ۔ کمیونسٹ پارٹی آف انڈیا (مارکسسٹ) کے ریاستی سیکریٹری محمد سلیم نے کہا کہ جمعرات کی صبح بھٹاچاریہ کی صحت اچانک خراب ہو گئی تھی۔ انہوں نے مزید کہا کہ ’’ڈاکٹر آئے لیکن وہ زیادہ کچھ کر نہیں سکے تھے۔ ان کی آخری رسومات کل ادا کی جائیں گی۔ انہوں نے اپنا جسم عطیہ کیا تھا ۔ اسی کے مطابق اسے میڈیکل کالج کے سپر د کیا جائے گا۔‘‘

خیال رہے کہ بھٹاچاریہ نے2000تا 2011مغربی بنگال کےو زیر اعلیٰ کے طور پر خدمات انجام دی تھیں۔ 2000 میں جیوتی باسو کے بعد وہ وزیر اعلیٰ بنے تھے۔ 1998تا2011 تک مغربی بنگال میں کمیونسٹ پارٹی آف انڈیا زیراقتدار تھی۔

وزیر اعظم نریندر مودی نے بھٹاچاریہ کی موت پر اظہار تعزیت کرتے ہوئے کہا ہے کہ وہ سیاستی قدآور تھے جنہوں نے بہترین طریقے سے ریاست کی قیادت کی تھی۔مغربی بنگال کی وزیر اعلیٰ ممتا بنرجی نے کہاکہ مجھے بھٹاچاریہ کی موت کا صدمہ اورافسوس ہے۔ہم نے پہلے ہی یہ فیصلہ کر لیا ہے کہ ہم ان کے آخری سفر اور رسومات کے دوران انہیں مکمل احترام اور رسمی اعزاز دیں گے۔